ਸ਼ਾਹੀ ਮਹਿਲਾਂ ਵਾਲ਼ੀ ਦੇ ਨਾਮ
ਤੇਰੀਆਂ ਜੁਲਫਾਂ ਦੀ ਤਾਰੀਫ ਕਿਵੇਂ ਕਰਾਂ ?
ਮੇਰੀ ਬੇਬੇ ਤੇ ਬਾਪੂ ਦੇ ਵਾਲ ਸਦਾ
ਗਰਨਿਆਂ 'ਚੋਂ ਕੱਢੀ ਸਣ ਵਾਗੂੰ
ਕਰਜੇ ਵਿੱਚ ਉਲ਼ਝੇ ਰਹੇ …।
ਤੈਨੂੰ ਫੁੱਲਾਂ ਦੇ "ਬੁੱਕੇ" ਕਿੰਝ ਦਿਆਂ ?
ਸਾਡੇ ਨਰਮੇਂ ਦੇ ਫੁੱਲਾਂ ਨੂੰ
ਅਮਰੀਕਨ ਸੁੰਡੀ ਨੇ ਖਾ ਲਿਆ …।
ਤੂੰ "ਵਾਲਮਾਰਟ" ਦੇ "ਪੌਪ ਕੌਰਨ"
"ਕਾਸਕੋ" ਦਾ ਲੂਣ ਭੁੱਕਕੇ ਖਾਂਦੀ ਰਹਿ
ਸਾਡੇ ਪਿੰਡ ਤਾਂ ਪੰਜਾਬੋ ਝਿਉਰੀ ਦੀ ਭੱਠੀ
ਰਾਤੀਂ ਕੋਈ ਢਾਹ ਗਿਆ…।
"ਕੋਕਾ-ਕੋਲਾ" ਤੇ "ਪੈਪਸੀ"
ਤੈਨੂੰ ਭਾਉਂਦੇ ਨੇ
ਤੇਰੇ ਮੰਤਰੀ ਅੰਕਲ ਦੀ ਫੈਕਟਰੀ ਦਾ ਪ੍ਰਦੂਸ਼ਤ ਪਾਣੀ
ਸਾਡੇ ਪਿੰਡ ਦਾ ਪਾਣੀ
ਜ਼ਹਿਰ ਬਣਾ ਗਿਆ…।
ਕੌਮੀ ਝੰਡਾ ਲਹਿਰਾਉਣ ਵਾਲੇ ਮਲਕ ਭਾਗੋ
ਯਾਰ ਨੇ ਤੇਰੇ ਡੈਡੀ ਦੇ
ਭਾਈ ਲਾਲੋ ਮਿੱਤਰ ਹੈਨ
ਮੇਰੇ ਬਾਪੂ ਦੇ…।
ਲਾਲ ਕਿਲਾ ਜਿੰਨਾ ਚਿਰ
ਰਾਵਣਾ ਨੂੰ ਵਜ਼ੀਰ ਬਣਾਉਦਾ ਰਹੂ
ਦੇਗ ਵਿੱਚ ਉਬਾਲਦਾ ਰਹੂ
ਦਿਆਲਿਆਂ ਨੂੰ
ਸਾਡਾ ਰਿਸ਼ਤਾ ਉਦੋਂ ਤੱਕ
ਨਹੀਉਂ ਪੁੱਗਣਾ…… ਨਹੀਉਂ ਪੁੱਗਣਾ…।।
ਗੁਰਮੇਲ ਬੀਰੋਕੇ
ਈਮੇਲ-gurmailbiroke@gmail.com
No comments:
Post a Comment